لبس البنات
لبس خروج للسوق, لبس المطعم, شارع, اعراس, للبنات هو اسلوب وطريقة اختيار احترافية.. يعني قمة الفرحة لما البنت تشوف صديقتها لابسة مثلها نفس الاسلوب خاصة في قعدة للبنات منعاً للحرج والانتقاد او انها مزودتها اكثر من اللازم بما لا يليق بالجلسة او اخف من الازم .. هيك يكون بالنص.
احلى اشي مجموعة البنات يكونوا اغلبهن نفس الطول وما في تغمز ولمز على طول الكعب .. او مثلا مجموعة بنات صحتهم منيحة والنحيفة فيهن منعا للحسد على رشاقتها تلبس لبس وسيع فضفاض وطويل ما يظهر معالم الخصر وهيك.
لبس قعدات العائلة الخالات والعمّات لازم يكون عادي وغير قابل للانتقاد يعني الوان خفيفة وقصات متداولة مش فجأة فستان مميز اشتريتيه من دكان "شيك وكلاس" تلبسه لانه حتماُ للسنة الجاي سيرتك وسيرة الفستان رح تتداول وتتبهر.
طبعا لبس الشارع المقصود منه المشي والطريق لمكان معيين في الشارع وحسب المنطقة وعشان تخرج وترجع بسلام, له طريقة اللبس عشان ما يكون تعليق او تحرش هون وهناك.
غير الفساتين اللي بشتروها بمناسبات وبدون مناسبات, تصفصف في الخزاين حسب الالوان والطول, ولبس "بعد الزواج" الكذبة من الاهل اللي تُقال "بس تتجوزي البسي اللي بدك اياه" ولبس ولبس ….
انا بكتب هذا الانتقاد عن البنات وقسم كبير فيه مني وبنتقد نفسي بالاول, لما اهم اشي عنا نعجب الناس بغض النظر من هم وانه المظهر الخارجي هو الاهم مع اني مقتنعة بالعكس بس الناس حولنا عندها السياسة المسيطرة في الحكم .