شوربة العدس مثل التبولة
شوربة العدس او عدس مجروش وكل بيت بسميها شكل حتى انه كل بيت بعمل طعمتها شكل.
الوضع ما بختلف عن التبولة انا بحبها بفصل الشتا وخصوصا لما تكون الدنيا كابسة برا شتا وهيك البيت دافي ولما تطلع ريحتها ويستوي العدس هذه الطريقة انا بعملها سهلة كتير , دايما انا وصفاتي سهلة وسريعه ما بعرف ليش مع اني بحياتي اليومية بحب التأني بكل شئ..
ولحد اليوم ما ذقت اطيب من شوربة ستي ام امي الله يرحمها
اول ما تزوجت بحثت كتير على وصفات في الانترنت ووجدت كثير وصفات تقريباً لا نهاية, عشان اطبخ شوربة العدس المجروش المثالية بس بالنهاية لقيت وصفة امي البسيطة اطيب اشي .
اللي جربها يقولي رأيه بالطعمة واللي عنده وصفة لذيذة يشاركني، بحب أجرب وصفات جديدة ..
الطريقة هيك:
بنقع العدس شي ربع ساعه بهدا الوقت بقطع بطاطا وجزر لقطع صغيرة صغيرة وبقلبهم مع زيت زيتون بالطنجرة وبضيف العدس بعد ما اغسله واصفيه وبحط مي مغليه فوقهم وبالاخر البهارات اللي هم ملح وفلفل اسود وكركم وكمون و اذا خنت نفسي D: بضيف معلقة مرقة دجاج لما اطفي النار بعصر حامضة ممكن على كل الطنجرة او على الصحن نفسه وجنبها خبز محمص ممكن تحميص البيت او خالص انا بحب الخالص اللي بطعم الزعتر.